Datgloi cyllid ar gyfer mannau gwyrdd a glas

Byddwch angen pobl gyda’r amser ymroddedig i’w roi i’r gwaith hwn. Byddant angen bod yn fedrus o ran creu newid, gweithio ar draws adrannau ac ymgysylltu gyda phartneriaid gan gynnwys Swyddogion Gweithredol a swyddogion etholedig. Mae’n waith arloesol, felly bydd y tîm yn dysgu am gysyniadau newydd, peth jargon ariannol a bod yn gyfforddus gyda pheidio â chael yr atebion i gyd ymlaen llaw.

Bydd eich tîm mewnol fwy na thebyg yn cynnwys cynrychiolwyr o’r adran gyllid, cyfreithiol, tai, cynllunio, strategaeth a gweithrediadau ac ystadau gwyrdd. Gallai’r gwaith hwn fod yn sail i ganllawiau cynllunio a roddir i ddatblygwyr gan gysylltu gyda Strategaethau Adfer Byd Natur Lleol, felly mae deall y cyd-destun hwn yn bwysig.

Dylai’r tîm ddeall sut mae tir yn cael ei ddefnyddio ar hyn o bryd a bod yn gallu deall y cyfle i newid. Bydd sgiliau rheoli cadwraeth a gwybodaeth am asesiadau ecolegol yn golygu y gallant gostio adferiad cynefinoedd, gwelliannau mynediad i’r cyhoedd a gwaith cynnal a chadw.

Bydd eich tîm prosiect craidd am ddod ag ymgynghorwyr allanol arbenigol at y bwrdd hefyd. Bydd y rhain yn cynnwys sefydliad cyllid allanol priodol sydd â’r sgiliau a’r hawl o ran rheoliadau. Byddant yn helpu i ddatblygu’r model ariannol er mwyn rheoli risg a’ch helpu chi i amlinellu eich achos busnes, sefydlu’r cyfrwng ei hun, a chael mynediad at fuddsoddiad.

Byddwch hefyd angen cymorth cyfreithiol er mwyn eich helpu i sefydlu’r banc cynefinoedd pan fyddwch yn barod i wneud hynny.

Mae peilota safleoedd yn eich helpu’n gyflym iawn i ddatblygu dealltwriaeth o’r galw am unedau bioamrywiaeth.

Gwnewch yn siŵr eich bod yn deall y tir rydych yn gweithio gydag ef. Does dim angen manylion llawn ar y cam hwn, dim ond gwybodaeth ynghylch ble mae’r prif safleoedd natur, eu maint, unrhyw ddynodiadau, rhyw lefel o wybodaeth cynefin ac amcanion rheoli sylfaenol.

Pan rydych yn dewis safleoedd peilot dylech ystyried eu maint, nifer, arwyddocâd, mynediad i’r cyhoedd a phartneriaid. Mae buddsoddiad preifat yn haws i’w ddenu ar raddfa fwy. Dylech anelu am isafswm o 50 hectar gyda’i gilydd a dim llai na 10 hectar y safle. Gallai grŵp o safleoedd peilot fod rhwng 20 hectar a 100 hectar. Mae’n bosib y byddwch am adnabod mwy o gynlluniau peilot na’r hyn rydych yn credu y byddwch eu hangen, rhag ofn na fydd un neu ddau ohonynt yn hyfyw.

Os yw safle o fewn eich Strategaeth Adfer Byd Natur Lleol, yna mae effaith lluosydd ym Metrig DEFRA ar gyfer cyfrifo unedau bioamrywiaeth, sy’n golygu y bydd yn creu 15% yn fwy o unedau bioamrywiaeth.

Does dim rhaid i chi fod wedi adnabod yr holl safleoedd yn eich Strategaeth Adfer Byd Natur Lleol er mwyn dewis safleoedd peilot, ond os oes gennych chi rai, neu y gallwch wneud hyn ar yr un pryd, yna mae’n syniad da.

Mae enillion net bioamrywiaeth yn cael eu mesur mewn unedau. Bydd llinell sylfaen yn dweud wrthych faint o unedau sydd gennych ar hyn o bryd ar y safle, at bwrpas cymharu yn ystod ac wedi’r gwaith adfer. Er mwyn canfod eich llinell sylfaen, byddwch angen asesiad ecolegol ar gyfer bob safle sy’n dal y data perthnasol. Oddi yma, gallwch gynnig sut i adfer y cynefin gan ddefnyddio metrig DEFRA i gyfrifo’r unedau – mae Asesiadau Cynefinoedd y DU yn mapio’n uniongyrchol ar fetrig DEFRA.

Gallwch ddewis i’ch asesiadau ecolegol gael eu gwneud yn annibynnol, gan ddarparu sicrwydd ychwanegol i’ch darpar fuddsoddwyr. Gallwch hefyd ddewis ymgymryd ag asesiadau cynefin ar draws y cyfan o’ch safleoedd posib, neu nifer ohonynt (nid dim ond safleoedd peilot).

Bydd hyn yn eich galluogi i gael trosolwg o’r unedau posib sydd ar gael ar draws y ddinas ac felly gael amcangyfrif o refeniw ar raddfa dinas dros 30 mlynedd.

Fel rhan o’ch gwaith paratoi, byddwch angen penderfynu sut all eich banc cynefinoedd eich helpu i fwyhau buddion amgylcheddol, cymdeithasol ac economaidd ar gyfer eich dinas neu dref, gan gadw refeniw a buddion yn lleol.

Bydd trafodaeth gynnar ar brif egwyddorion gwrthbwyso yn eich helpu chi i ymgorffori’r elfennau sy’n fwyaf pwysig i chi.

Cymerwch olwg ar ein hegwyddorion gwrthbwyso awgrymedig drwy glicio ar y botwm ar y chwith.

Eich cyflenwad yw’r gwahaniaeth rhwng yr unedau gwaelodlin a’r nifer o unedau y bydd safle yn ei gynhyrchu wedi i gynefin gael ei greu neu ei adfer.

Fel arfer gelwir y rhan hon o’r broses yn ‘asesiad cyflenwi’ oherwydd rydych yn cyfrifo faint o welliant (sy’n cael ei fesur mewn unedau) y gellir eu gwerthu i ddatblygwyr. Bydd arbenigwyr cawraeth yn cynghori pa waith adfer neu greu sy’n bosib o’ch asesiad gwaelodlin.

Yn 2021, awgrymodd adroddiad DEFRA y dylai pris y farchnad fesul uned bioamrywiaeth fod rhwng £20,000 a £25,000. Bydd eich partneriaid ariannol yn sicrhau bod gennych y prisiau marchnad diweddaraf.

Gellir gwerthu unedau bioamrywiaeth oddi allan i’r gymdogaeth drwy ddatblygwyr sy’n cael eu cymell i brynu yn eu hardal leol.

Mae deall targedau twf lefel uchaf ar gyfer seilwaith, trafnidiaeth a thai gynnig sicrwydd bod digon o alw ar y gweill. Mae hyn yn arbennig o wir ar gyfer llefydd sy’n ceisio bodloni’r holl alw lleol, a pheidio â gor-gyflenwi’r hyn allai fod ei angen.

Nodwch os oes gan gynllun datblygu hawliau eisoes, mae’n bosib na fydd gofyn iddo ddarparu cynnydd net mewn bioamrywiaeth.

Hefyd cofiwch eich bod yn edrych ar alw mwy hirdymor gan fod unedau bioamrywiaeth yn cael eu gwerthu ar unrhyw bryd o’r drydedd i thua’r bymthegfed flwyddyn.

Mae’n well i chi wneud y modelu hwn gyda phartner ariannol masnachol allanol profiadol. Bydd arbenigedd ecolegol eisoes wedi penderfynu pa ymyriadau ddylai ddigwydd ym mhob safle. Nawr rydych angen gwybod beth allai’r rhain ei gostio, gan gynnwys gwaith adfer, cynnal a chadw a chost darparu mynediad i’r cyhoedd.

Rydym yn awgrymu dechrau’n uchel, gan gynnwys yr holl gostau sy’n gysylltiedig gyda’ch blaenoriaethau sefydledig. Gallwch edrych ar leihau’r costau hyn yn nes ymlaen os oes angen.

Mae hwn yn ddadansoddiad cadarn ac yn fodel gweithio y dylid ei ddiweddaru’n barhaus er mwyn sicrhau cywirdeb. Mae’n cynnig data er mwyn gwneud penderfyniadau ynghylch pa safleoedd sy’n hyfyw, beth yw’r amser gorau i werthu unedau bioamrywiaeth ac i brofi egwyddorion a syniadau. Er enghraifft, gallai eich helpu chi i ddeall faint o flynyddoedd y tu hwnt i’r isafswm tymor o 30 mlynedd y gallai unrhyw waddol dalu am gostau cynnal a chadw.

Mae risg yn cael ei reoli’n rhannol drwy fetrig DEFRA sy’n cynnwys lluosogydd anhawster ar gyfer cynefinoedd sy’n fwy anodd i’w hadfer, a ffactor gostyngiad ar gyfer gwerthu unedau ymlaen llaw cyn i’r cynefin a gynlluniwyd gael ei ddarparu.

Bydd eich partner ariannol allanol yn cefnogi rheoli risg ymhellach drwy fodelu i roi cyfrif am newidiadau mewn prisiau’r farchnad, addasiadau ar gyfer chwyddiant, costau gweithredu ar gyfer y banc cynefinoedd ac ymgorffori tir clustogi ar gyfer newid mewn galw.

Dylai’r achos busnes fod yn eglur ac yn gryno, gan ddefnyddio templedi a phrotocolau cyfarwydd ar gyfer gwneud penderfyniadau mewnol, megis cyflwyno opsiynau.

Dylech ganolbwyntio ar y penderfyniadau sydd angen eu gwneud er mwyn sicrhau mandad i symud eich gwaith ymlaen yn hytrach na materion technegol – mae’n bosib y gallech gynnwys dogfennau cefnogol sy’n cynnwys unrhyw waith darllen technegol neu gefndirol.

Wrth i chi symud eich achos busnes yn ei flaen, gall fod yn ddefnyddiol os yw eich partner ariannol allanol ar gael i ateb cwestiynau technegol neu hyd yn oed i gyd-gyflwyno.

Dylai eich partner ariannol allanol eich helpu gyda’r broses o ddylunio’r strwythur cyfalaf a chorfforaethol. Mae hyn yn cynnwys sicrhau llif arian tuag at eich prif fuddion. Er enghraifft, ariannu gwaith cynnal a chadw hirdymor.

Byddwch hefyd angen sicrhau cyngor allanol ar lywodraethiant a pha strwythurau cyfreithiol (e.e. cwmni traddodiadol neu elusen) sydd orau i chi ac unrhyw gontractau y gallech fod angen eu drafftio.

Unwaith eich bod wedi ei sefydlu, bydd y banc cynefinoedd angen gwasanaethau cyfrifo ac yswiriant a chyfrif banc. Gall eich partner ariannu allanol wedyn ddenu buddsoddwyr gan ddefnyddio deunyddiau sy’n cydymffurfio gyda rheoliadau’r Awdurdod Ymddygiad Ariannol.

Byddant yn negodi ac yn cau’r ddêl buddsoddi. Bydd y banc cynefinoedd yn cofrestru unrhyw unedau bioamrywiaeth a werthir. Bydd yn monitro adrodd ac yn dilysu cydymffurfiad gyda’r cynllun rheoli cynefinoedd, gan gyflwyno data i’r corff perthnasol.